ភ្នំពេញ៖ រដ្ឋបាលរាជធានីភ្នំពេញនឹងបិទកំណាត់មហាវិថីឈ្នះ-ឈ្នះ ចាប់ពីគល់ស្ពានព្រែកព្នៅរហូតដល់ផ្លូវជាតិលេខ៦ នៅព្រឹកថ្ងៃទី១៨ ខែធ្នូ ឆ្នាំ២០២១ ចាប់ពីម៉ោង៥ព្រឹក ដើម្បីរៀបចំសម្ពោធដាក់ឱ្យប្រើប្រាស់ផ្លូវការពហុកីឡដ្ឋានជាតិមរតតេជោក្រោមអធិបតីភាពនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

ក្នុងសេចក្ដីជូនដំណឹងចុះថ្ងៃទី១៣ ខែធ្នូ ឆ្នាំ២០២១នេះ រដ្ឋបាលរាជធានីភ្នំពេញបានជូនដំណឹងដល់ពលរដ្ឋទាំងអស់ ជាពិសេសម្ចាស់ការដ្ឋានសំណង់នានា ម្ចាស់អាជីវកម្មក្រឡុកស៊ីម៉ង់ត៍ ម្ចាស់រថយន្តដឹកទំនិញគ្រប់ប្រភេទ និងរថយន្តទេសចរណ៍ដែលត្រូវឆ្លងកាត់មហាវិថីឈ្នះឈ្នះ ឱ្យទៅពង្វាងចរាចរឆ្លងកាត់តាមស្ពានព្រែកក្ដាមវិញ ដើម្បីបញ្ជៀសនូវការកកស្ទះ។

ពហុកីឡដ្ឋានជាតិមរតកតេជោ មានទីតាំងស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ដែលបានចំណាយកញ្ចប់ទឹកប្រាក់សាងសង់ប្រមាណ ១៦០លានដុល្លារអាមេរិក ជាជំនួយឥតសំណងរបស់រដ្ឋាភិបាលសាធារណរដ្ឋប្រជាមានិតចិន និងប្រជាជនចិន មកកាន់រាជរដ្ឋាភិបាលកម្ពុជា។ កីឡដ្ឋានដ៏ប្រណិត និងទំនើបនេះ អាចផ្ទុកអ្នកទស្សនាបានប្រមាណ ៦ម៉ឺននាក់នេះ ដើម្បីត្រៀមស្វាគមន៍ព្រឹត្តិការណ៍ប្រវត្តិសាស្ដ្រកីឡាស៊ីហ្គេម និងអាស៊ានប៉ារ៉ាហ្គេមនាឆ្នាំ២០២៣ នៅកម្ពុជា៕